ရန်ကုန် – မတ် – ၂၄-၂၀၂၄
GG (VOM)
ရန်ကုန်တိုင်း၊ လှည်းကူးမြို့နယ်အပိုင်၊ အမြန်လမ်းမကြီး မိုင်တိုင် 0/4 အနီး လမ်းဘေးမှာ မတ်လ ၂၃ ရက်နေ့ မနက်ပိုင်းက ထိုးသွင်းဒဏ်ရာတွေနဲ့ သေဆုံးနေတဲ့ အမျိုးသားနဲ့ အမျိုးသမီး ရုပ်အလောင်း တွေ့ရှိခဲ့ရတယ်လို့သိရပါတယ်။
သေဆုံးအမျိုးသမီးမှာ ၂၇ နှစ်ခန့်အရွယ်ခန့်ရှိပြီး အမျိုးသားက အသက် ၃၆ နှစ်အရွယ်ရှိကြောင်း၊ ဒဏ်ရာအနေနဲ့က အမျိုးသမီးမှာ နောက်ကျောဘက်မှာ ထိုးသွင်းဒဏ်ရာတချက်တွေ့ရပြီး အမျိုးသားမှာတော့ လက်မောင်းနှစ် ဖက်မှာ ပြတ်ရှဒဏ်ရာ နှစ်ချက်နဲ့ ရင်ဘတ်မှာ ထိုးသွင်းဒဏ်ရာတချက်တွေ့ရှိရတယ်လို့ဆိုပါတယ်။
” ရဲကလှမ်းခေါ်လို့ သွားပြီး ရုပ်အလောင်းသယ်ရတယ်။ဆွေမျိုးသားချင်းတွေနဲ့လည်း မတွေ့ရပါဘူး။ဆိုတော့ လှည်းကူးကလား ဘယ်မြို့ကလဲဆိုတာမသိရပါဘူး။မျက်စိနဲ့မြင်ရတာတော့ အမျိုးသမီးမှာ ထိုးသွင်းဒဏ်ရာတချက်၊အမျိုးသားမှာ ပြတ်ရှဒဏ်ရာ နှစ်ခုနဲ့ ထိုးသွင်းဒဏ်ရာတချက်တွေ့ရတယ်။” လို့ ကူညီရေးလမ်းကြောင်း ဆောင်ရွက်ပေးခဲ့တဲ့ ကရုဏာရှင်နာရေးကူညီမှုအသင်း အဖွဲ့ဝင်တယောက်ကပြောပါတယ်။
ရုပ်အလောင်းတွေကိုတော့ မတ်လ ၂၃ ရက် မနက်ပိုင်းမှာပဲ သွားရောက်သယ်ဆောင်ကာ လှည်းကူးဆေးရုံကိုပို့ဆောင်ခဲ့ကြောင်း ၊လက်ရှိမှာတော့ ရုပ်အလောင်းကို သက်ဆိုင်ရာတာဝန်ရှိသူတွေက စစ်ဆေးပြီး မီးသဂြိုလ်လိုက်ပြီလို့သိရပါတယ်။
လှည်းကူးမြို့နယ် အပိုင် အမြန်လမ်းမကြီးမှာ အရင်ကလည်း မကြာခဏဆိုသလို လမ်းဘေးအလောင်းစွန့်ပစ်တဲ့ဖြစ်စဥ်တွေရှိခဲ့တယ်လို့ သိရပါတယ်။
Photo Crd: Original Uploader
